Mae Undeb Rygbi Cymru wedi penderfynu ymuno gyda’r cynllun arbrofol hwn yn y gêm gymunedol fydd yn golygu y bydd pob tacl gyfreithlon bellach yn gorfod digwydd o dan y sternwm.
Trafodwyd cyflwyno’r rheol yn helaeth gyda’r clybiau cymunedol a rhanddeiliaid eraill Undeb Rygbi Cymru dros yr haf ac mae’r hyfforddwyr wedi bod yn dysgu a disgyblu eu chwaraewyr am eu techneg taclo cyn i’r tymor newydd ddechrau.
Bydd y rheol newydd yn berthnasol ar gyfer pob lefel o rygbi cymunedol o 12 oed hyd at Uwch Gynghrair y Menywod a Phencampwriaeth y Dynion ar gyfer tymor 2023/24. Bydd hyn hefyd yn cynnwys rygbi ysgolion, colegau a phrifysgolion.
Bydd y rheolau taclo o dan 12 oed yn parhau fel y bu yn y gorffennol ac ni fydd yr oedrannau hyn yn mabwysiadu’r rheolau taclo newydd.
Ni fydd timau Uwch Gynghrair Indigo na’r Rhanbarthau yn cymryd rhan yn yr arbrawf hwn ar hyn o bryd chwaith.
CLICK HERE / CLICIWCH YMA i ddarllen mwy am y Rheolau Taclo newydd.
